ಕಬೀರ್ ಎನ್ಕೌಂಟರ್ ಮತ್ತು ಆನಂತರದ ರಾಜಕೀಯ

ಶೃಂಗೇರಿಯಲ್ಲಿ  ನಕ್ಸಲ್ ನಿಗ್ರಹ ಪಡೆಯ ಪೇದೆಯೊಬ್ಬನ ಗುಂಡಿಗೆ ಬಲಿಯಾದ ಮಂಗಳೂರಿನ ದನದ ವ್ಯಾಪಾರಿ ಕಬೀರ್ ಸಾವಿನ ನಂತರ ದಕ್ಷಿಣ ಕನ್ನಡ , ಉಡುಪಿ ಹಾಗೂ ಚಿಕ್ಕಮಗಳೂರು ಜಿಲ್ಲೆಯಲ್ಲಿ ಆತನ ಪರ  ಮತ್ತು ವಿರೋಧದ ಹೋರಾಟ ರಾಜಕೀಯ ಜೋರಾಗಿದ್ದು ಕಬೀರ್ ಸಾವಿಗೆ ನ್ಯಾಯ ಸಿಗಬೇಕೆಂದು ಹಲವು ಸಂಘಟನೆಗಳು ಹೋರಾಟ ನಡೆಸುತ್ತಿದ್ದರೆ ಕಬೀರ್ ನನ್ನು ಎನ್ಕೌಂಟರ್ ಮಾಡಿದ ಪೇದೆ ನವೀನ್ ನಾಯಕ್ ವಿರುದ್ಧ ಮೊಕದ್ದಮೆ ದಾಖಲಿಸಿದ್ದನ್ನು ವಿರೋಧಿಸಿ ಕೆಲ ಸಂಘಟನೆಗಳು ಸಹ ಬೀದಿಗಿಳಿದಿದೆ. ಸಾವಿನ ಮುಂಚೆ ಜಗತ್ತಿಗೆ ತೀರಾ ಅಪರಿಚಿತನಾಗಿದ್ದ ಕಬೀರ್ ಸಾವಿನ ನಂತರ ಈ ಭಾಗದ ಜನರ ಮನೆ ಮಾತಾಗಿದ್ದಾನೆ . ಕಬೀರ್  ನನ್ನು ಹುತಾತ್ಮ ಎನ್ನುವವರಿದ್ದರೆ ಆತ ಓರ್ವ ಅಕ್ರಮ ದನ ಸಾಗಾಟಗಾರನಾಗಿದ್ದು ಈ
ಕೃತ್ಯಕ್ಕಾಗಿ ಆತನಿಗೆ ಸರಿಯಾದ ಶಿಕ್ಷೆ ಸಿಕ್ಕಿದೆ ಎನ್ನುವವರೂ ಇದ್ದಾರೆ . ಕಬೀರ್ ಸಾವಿನ ನಂತರ ಆತನ ಸಾವನ್ನು ತಮಗೆ ಬೇಕಾದ ಹಾಗೆ ಅಂದರ ಪರ ಮತ್ತು ವಿರೋಧವಾಗಿ  ರಾಜಕೀಯ ಲಾಭಕ್ಕೆ ಬಳಸಿಕೊಳ್ಳುವ ಪ್ರಯತ್ನಗಳು ನಡೆದಿದ್ದು ಅದು ಮುಂದುವರಿಯುತ್ತಲೂ ಇದೆ .

ಕಬೀರ್ ಕುಟುಂಬ ಹಲವು ತಲೆಮಾರುಗಳಿಂದ ದನದ ವ್ಯಾಪಾರವನ್ನೇ ತನ್ನ ಕುಲಕಸುಬಾಗಿ ಮಾಡಿಕೊಂಡು ಬಂದಿತ್ತು . ಮಲೆನಾಡಿನ ಭಾಗದಲ್ಲಿ ರೈತರು ಮಾರುವ ಅನುಪಯುಕ್ತ ದನಗಳನ್ನು ಹಣ ಕೊಟ್ಟು ಖರೀದಿಸಿ ತಂದು ಮಾರುವ ಕಸುಬನ್ನು ಈತನ ತಂದೆಯೂ ನಡೆಸಿಕೊಂಡು ಬರುತ್ತಿದ್ದರು . ಅವರಿಗೆ ವಯಸ್ಸಾದ ನಂತರ ಈ ವೃತ್ತಿಯನ್ನು ಕಬೀರ್ ಮುಂದುವರೆಸಿಕೊಂಡು ಬಂದಿದ್ದ .  ಇದರಿಂದ ಈತನ ಕುಟುಂಬದ ಜೀವನವೂ ನಡೆಯುತ್ತಿತ್ತು . ಹಣ ಕೊಟ್ಟು ರೈತರಿಂದ
ದನಗಳನ್ನು ಖರೀದಿಸಿದರೂ ಅದನ್ನು ಸಾಗಿಸುವ ಕೆಲಸ ಮಾತ್ರ ಅಷ್ಟು ಸುಲಭವಲ್ಲ . ಮಲೆನಾಡಿನ ಗಡಿ ಭಾಗಗಳಲ್ಲಿ ರಾತ್ರಿ ಸಮಯದಲ್ಲಿ ಪೊಲೀಸರಿಗೆ ಮತ್ತು ಕೆಲ ಕೋಮುವಾದಿ ಸಂಘಟನೆಗಳ ಪ್ರಮುಖರಿಗೆ ಮಾಮೂಲಿ ಕೊಟ್ಟು ದನಗಳನ್ನು ತುಂಬಿದ ವಾಹನವನ್ನು ಸಾಗಿಸುವುದು ಈ ವೃತ್ತಿಯಲ್ಲಿ ಮಾಮೂಲಿಯಾದ ಸಂಗತಿ . ರಾತ್ರಿ ವೇಳೆಯಲ್ಲಿ ಇಂತಹ ವಾಹನಗಳನ್ನು ಕಾದು
ಅವರಿಂದ ಮಾಮೂಲಿ ಪಡೆದು ವಾಹನ ತೆರಳಲು ಅನುವು ಮಾಡಿಕೊಡುವ ಕೆಲ ಕೇಸರಿ ಸಂಘಟನೆಗಳಲ್ಲಿ ಸಕ್ರಿಯರಾಗಿರುವ ಯುವಕರ ಗುಂಪನ್ನು ಮಲೆನಾಡಿನಲ್ಲಿ ಅಲ್ಲಲ್ಲಿ ಕಾಣಲು ಸಾಧ್ಯ . ದನ ಸಾಗಾಟಕ್ಕೆ ಸಂಘ ಪರಿವಾರದ ವಿರೋಧ ಇರುವ ಕಾರಣಕ್ಕಾಗಿಯೇ ಅದರಲ್ಲಿರುವ ಕೆಲವರಿಗೆ ಮಾಮೂಲಿ ಫಿಕ್ಸ್ ಮಾಡಿ ದನ ಸಾಗಿಸುವುದು ಈ ವೃತ್ತಿಯಲ್ಲಿ ಪಳಗಿರುವ ಕೆಲವರ
ವ್ಯವಹಾರ ರಹಸ್ಯ  . ಇನ್ನು ಪೊಲೀಸರಿಗೆ ಇಂತಿಷ್ಟು ಅಂತ ಎಲ್ಲಾ ಕಡೆ ಮಾಮೂಲಿ ಫಿಕ್ಸ್ ಆಗಿರುತ್ತದೆ . ಹೀಗಾಗಿ  ಸಕ್ರಮವಾಗಿ ಖರೀದಿಸಿದ ದನಗಳನ್ನು ಸಾಗಿಸಲು ರಾತ್ರಿ ವೇಳೆಯಲ್ಲಿ ಸರ್ಕಾರಿ ಪೊಲೀಸರು ಮತ್ತು ನೈತಿಕ ಪೋಲೀಸರ ಕೃಪಾಕಟಾಕ್ಷದ ಅವಶ್ಯಕತೆ ಈ ದನದ ವ್ಯಾಪಾರಿಗಳಿಗೆ ಇರುತ್ತದೆ .

ಕಬೀರ್ ಈ ವೃತ್ತಿಯಲ್ಲಿ ಪಳಗಿದ ಕಾರಣಕ್ಕಾಗಿಯೇ ಆತನಿಗೆ ಎಲ್ಲೆಲ್ಲಿ ಮಾಮೂಲಿ ಕೊಡಬೇಕು ಎನ್ನುವ ಮಾಹಿತಿಯಿತ್ತು . ಜೊತೆಗೆ ವ್ಯಾಪಾರದ ಹಿತದೃಷ್ಟಿ ಮತ್ತು ಸುರಕ್ಷತೆಯ ದೃಷ್ಟಿಯಿಂದ ಹಿಂದುಳಿದ ಜನಾಂಗದ ಯುವಕ ಪ್ರಮೋದ್ ಪೂಜಾರಿಯನ್ನೂ ತನ್ನ ಜೊತೆ ವ್ಯವಹಾರದಲ್ಲಿ ಸೇರಿಸಿಕೊಂಡಿದ್ದ . ಪ್ರಮೋದ್ ಪೂಜಾರಿಯಂತಹ ಯುವಕರು ಈ ಭಾಗದಲ್ಲಿ
ದನದ  ವ್ಯಾಪಾರಿಗಳ ಜೊತೆಯಲ್ಲಿ ಸಾಮಾನ್ಯವಾಗಿ  ಕಾಣ ಸಿಗುತ್ತಾರೆ . ಇದಕ್ಕಾಗಿ ಅವರಿಗೆ ಉತ್ತಮ ಮೊತ್ತದ ಸಂಭಾವನೆ ಮತ್ತು  ಲಾಭದಲ್ಲಿ ಪಾಲನ್ನು ನೀಡಲಾಗುತ್ತದೆ . ಇವರು ಒಂದು ರೀತಿಯಲ್ಲಿ ಸುರಕ್ಷತೆಗಾಗಿ ಬಳಸಲ್ಪಡುವ ಗುರಾಣಿಯ ತರಹ . ಇವರನ್ನು ಮುಂದಿಟ್ಟುಕೊಂಡೇ ದನದ ವ್ಯಾಪಾರವನ್ನು ಕುದುರಿಸಲಾಗುತ್ತದೆ. ಇವರ ಮೂಲಕವೇ ದನ ಸಾಗಾಟಕ್ಕೆ ಅಡ್ಡಿ ಮಾಡುವವರ ಜೊತೆ ವ್ಯವಹಾರವನ್ನೂ ಕುದುರಿಸಲಾಗುತ್ತದೆ .  ಇಂತಹ ವೃತ್ತಿಯಲ್ಲಿ ಪಳಗಿದ ಪ್ರಮೋದ್ ಪೂಜಾರಿಯ ಮೇಲೂ ಕೆಲ ಪ್ರಕರಣಗಳು ದಾಖಲಾದ ಬಗ್ಗೆ ಮಾಹಿತಿಯಿದೆ .

ಶೃಂಗೇರಿಯ ತನಿಕೋಡು ಚೆಕ್ ಪೋಸ್ಟ್ ನಲ್ಲಿ ನಡೆದ ಕಬೀರ್ ಎನ್ಕೌಂಟರ್ ಸಮಯದಲ್ಲಿ ಇದೇ ಪ್ರಮೋದ್ ಪೂಜಾರಿ ದನಗಳನ್ನು ಹೊತ್ತ ವಾಹನ ಚಲಾಯಿಸುತ್ತಿದ್ದ . ಈತ ಆರಂಭಿಕ ಹಂತದಲ್ಲಿ ನೀಡಿದ ಮಾಹಿತಿಯಂತೆ ದನ ಸಾಗಾಟದ ವಾಹನ ನಿಲ್ಲಿಸಿದ ನಕ್ಸಲ್ ನಿಗ್ರಹ ಪಡೆಯ ಸಿಬ್ಬಂದಿ ಹಿಂಬದಿಯಲ್ಲಿ ದನಗಳ ಜೊತೆ ಇದ್ದ ಕಬೀರ್ ಎದೆಗೆ ಗುಂಡು ಹಾರಿಸಿ ಆತನನ್ನು ಕೊಲೆ ಮಾಡಿದ್ದರು . ಆದರೆ ಈಗ ಪ್ರಮೋದ್ ಪೂಜಾರಿ ಉಲ್ಟಾ ಹೊಡೆದಿದ್ದಾನೆ . ಕಬೀರ್ ಎ.ಎನ್.ಎಫ್ ಸಿಬ್ಬಂದಿಯ ಮೇಲೆ ಕಲ್ಲು ತೋರಿದ ಕಾರಣಕ್ಕಾಗಿ ಎನ್ಕೌಂಟರ್ ನಡೆದಿದ್ದು ತನ್ನನ್ನು ಬೇರೆ ಕಾರಣಕ್ಕೆ ಪುಸಲಾಯಿಸಿ ಕರೆದುಕೊಂಡು ಹೋಗಿ ಆ ನಂತರ ಬೆದರಿಸಿ ದನ ಸಾಗಾಟದ ವಾಹನವನ್ನು ಚಲಾಯಿಸುವಂತೆ ಮಾಡಲಾಗಿದೆ ಎಂಬ ಹೇಳಿಕೆಯನ್ನು ಸ್ಥಳೀಯ ಟಿವಿ
ಚಾನೆಲ್ ಒಂದರಲ್ಲಿ ಹೇಳಿಕೊಂಡಿದ್ದಾನೆ . ಕಬೀರ್ ಸಾವು ನಡೆದ ಸಮಯದಲ್ಲಿ ಒಂದು ರೀತಿಯ ಹೇಳಿಕೆ ನೀಡಿದ್ದ ಪ್ರಮೋದ್ ಪೂಜಾರಿಯ ಮೇಲೆ ಸ್ಥಳೀಯ ಸಂಘ ಪರಿವಾರದ ನಾಯಕರು ಕೆಂಗಣ್ಣು ಬೀರಿದ್ದರು . ಆತನ ಮನೆಯವರಿಗೂ ಬೆದರಿಕೆಗಳು ಹೋಗಿತ್ತು .ಈ ಕುರಿತು ಪತ್ರಿಕೆಗಳಲ್ಲೂ ವರದಿಯಾಗಿತ್ತು . ಆ ನಂತರ ಭೂಗತನಾಗಿದ್ದ ಪ್ರಮೋದ್ ಪೂಜಾರಿ ಈಗ ಮತ್ತೆ
ಕಾಣಿಸಿಕೊಂಡಿದ್ದು ಘಟನೆಯ ಕುರಿತಂತೆ ತಾನೇ ಈ ಹಿಂದೆ ನೀಡಿದ ಹೇಳಿಕೆಗಳಿಗೆ ವ್ಯತಿರಿಕ್ತವಾಗಿ ಹೊಸ ಹೇಳಿಕೆಗಳನ್ನು ನೀಡಿದ್ದಾನೆ . ಇಲ್ಲಿ ಪ್ರಮೋದ್ ಪೂಜಾರಿ ಸಂಘ ಪರಿವಾರದ ಬೆದರಿಕೆಗೆ ಹೆದರಿ ಸ್ನೇಹಿತನಿಗೆ ಮೋಸ ಮಾಡಿದ್ದಾನೆ ಅನ್ನುವವರೂ ಇದ್ದಾರೆ . ಅದೇನಿದ್ದರೂ  ನಿಷ್ಪಕ್ಷಪಾತ   ತನಿಖೆಯಿಂದ ಮಾತ್ರ ಸತ್ಯ ಹೊರಬರಲು ಸಾಧ್ಯ .

ಇನ್ನುಕಬೀರ್ ದನ ಕಳ್ಳ ಎನ್ನುವವರ ಬಳಿ ಆತ ದನಗಳನ್ನು ಕದ್ದು  ಸಾಗಿಸಿರುವುದಕ್ಕೆ ಯಾವ ದಾಖಲೆಯೂ ಇಲ್ಲ . ಶೃಂಗೇರಿ ಆಸುಪಾಸಿನ ಪೋಲಿಸ್ ಠಾಣೆಗಳಲ್ಲಿ ಈ ಸಮಯದಲ್ಲಿ ದನ ಕಳ್ಳತನ ನಡೆದ ಪ್ರಕರಣವೂ ದಾಖಲಾಗಿಲ್ಲ . ಹೀಗಿದ್ದರೂ ಸಂಘಪರಿವಾರ ಆತನನ್ನು ದನ ಕಳ್ಳ ಅನ್ನುತ್ತಿದೆ . ವಾಹನದಲ್ಲಿ ಐದು ದನಗಳನ್ನು ಸಾಗಿಸುವ ಜಾಗದಲ್ಲಿ ಇಪ್ಪತ್ತಕ್ಕೂ
ಹೆಚ್ಚು ದನಗಳನ್ನು ಅಮಾನವೀಯವಾಗಿ ಸಾಗಿಸಿದ್ದ ಎಂದು ಹೇಳುತ್ತಿವೆ . ಆದರೆ ನಕ್ಸಲ್ ನಿಗ್ರಹ ಪಡೆಯ ಗುಂಡಿಗೆ ಬಲಿಯಾದ ಕಬೀರ್ ಇದೇ ವಾಹನದ ಹಿಂಬದಿಯಲ್ಲಿ ಇದೇ ಇಪ್ಪತ್ತಕ್ಕೂ ಹೆಚ್ಚು ದನಗಳ ಮಧ್ಯದಲ್ಲಿ ಇದ್ದ ಎನ್ನುವ ಸತ್ಯವನ್ನು ಮರೆಮಾಚುತ್ತಿವೆ. ಕಬೀರ್ ಬಗ್ಗೆ ದ್ವೇಷ ಮೂಡಿಸಿ ದನಗಳ ಬಗ್ಗೆ ಅನುಕಂಪ ಮೂಡಿಸುತ್ತಿವೆ . ಸರ್ಕಾರ ಘೋಷಿಸಿದ
ಪರಿಹಾರಕ್ಕೆ ಖಂಡನೆ ಮಾಡಿ ಗುಂಡು ಹೊಡೆದ ಪೇದೆಗೆ ಒಂದು ಲಕ್ಷ ರೂಪಾಯಿ ಪರಿಹಾರವನ್ನು ಕಾವಿಧಾರಿಯೊಬ್ಬ ಘೋಷಣೆ ಮಾಡಿದ್ದಾನೆ . ಇನ್ನು ಪರ ವಿರೋಧದ ಪ್ರತಿಭಟನೆಯಲ್ಲಿ ಧರ್ಮದ ವಾಸನೆ ಬರ  ತೊಡಗಿದೆ . ಧರ್ಮದ ಕಾರಣಕ್ಕಾಗಿಯೇ ಕಬೀರ್ ಕೊಲೆಯನ್ನು ಸಮರ್ಥಿಸುವವರೂ ಮತ್ತು ವಿರೋಧಿಸುವವರೂ ಇದ್ದಾರೆ .  ಆದರೆ ಹಾಗಾದಂತೆ ಎಚ್ಚರ ವಹಿಸಬೇಕಾಗಿರುವುದು ಈ ಭಾಗದ ಪ್ರಗತಿಪರ ಮತ್ತು ಜಾತ್ಯಾತೀತ ನಾಯಕರ ಕರ್ತವ್ಯ ಕೂಡ . ಕಬೀರ್ ಕೊಲೆ ಖಂಡಿಸಿ ನಡೆಸುವ ಪ್ರತಿಭಟನೆ ಪ್ರಭುತ್ವದ ದೌರ್ಜನ್ಯದ ವಿರುದ್ಧದ ಹೋರಾಟವಾಗಬೇಕೇ  ಹೊರತು ಆತ ಮುಸ್ಲಿಮನೆಂಬ ಕಾರಣಕ್ಕಾಗಿ ಹೋರಾಟ ಎಂಬಂತೆ ಆಗದ ರೀತಿಯಲ್ಲಿ  ನೋಡಿಕೊಳ್ಳಬೇಕಾಗಿರುವುದು ಈ ಭಾಗದಲ್ಲಿ ಪ್ರಭುತ್ವದ ದೌರ್ಜನ್ಯಕ್ಕೆ ಒಳಗಾಗಿ ಪ್ರಾಣ ತೆತ್ತ ಅಮಾಯಕರಿಗೆ ಸಲ್ಲಿಸುವ ನಿಜವಾದ ಶ್ರದ್ದಾಂಜಲಿ .